མཁས་དབང་བློ་བཟང་སེང་གེས་སྲིད་སྐྱོང་ཞེས་པར་མཚན་རྟགས་བཀོད་པ།

གཟའ་ཕུར་བུ།, 27 ཕྱི་ཟླ་དགུ་པ། 2012 11:15 . རྒྱལ་སྤྱིའི་བོད་ཀྱི་ཆ་འཕྲིན། ཕྱི་ལོ་༢༠༡༢ཟླ་༩ཚེས་༢༧ཉིན། གྲོས་ཚོགས་སུ་བཀའ་བློན་ཁྲི་པ་ཞེས་པའི་ཚབ་ཏུ་སྲིད་སྐྱོང་ཞེས་སྤྱི་མོས་ཐོག་བསྐྱར་བཅོས་བྱུང་བའི་བཅའ་ཁྲིམས་དོན་ཚན་བཅུ་དགུ་པར་སྲིད་སྐྱོང་བློ་བཟང་སེང་གེ་མཆོག་གིས་མཚན་རྟགས་བཀོད་པ་ཡོད་པ་རེད། དེ་ཡང་ཟླ་འདིའི་ཕྱི་ཚེས་ ༢༦ རེས་གཟའ་ལྷག་པའི་ཉིན་གྱི་སྔ་དྲོ་སྲིད་སྐྱོང་བློ་བཟང་སེང་གེ་མཆོག་གིས་བཀའ་ཤག་ལྷན་ཚོགས་སུ་སྐབས་བཅོ་ལྔ་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཞི་པའི་སྐབས་བཅའ་ཁྲིམས་དོན་མཚན་ ༡༩ ནང་གསལ་བཀའ་བློན་ཁྲི་པ་ཞེས་པའི་མཚན་བྱང་གི་ཚབ་ཏུ་སྲིད་སྐྱོང་ཞེས་འབོད་རྒྱུར་སྤྱི་མོས་བྱུང་བ་དེར་ཁྲིམས་མཐུན་ལག་བསྟར་གནང་རྒྱུའི་མཚན་རྟགས་བཀོད་ཡོད། མཛད་སྒོའི་སྐབས་སྲིད་སྐྱོང་མཆོག་གིས་གཙོས་བཀའ་བློན་ལྷན་རྒྱས་དང་བཀའ་དྲུང་གཡུ་ཐོག་ཀརྨ་དགེ་ལེགས་ལགས། ཚོགས་དྲུང་ལས་ཁུངས་ཀྱི་དྲུང་ཆེ་སྟོབས་རྒྱལ་ལགས་བཅས་ཚང་འཛོམས་ཀྱིས་ཐོག་མར་སྲིད་སྐྱོང་མཆོག་གིས་ྋརྒྱལ་བའི་སྐུ་པར་མཐོང་གྲོལ་རིན་པོ་ཆེ་མཆོག་ལ་མཇལ་དར་སྒྲོན་འབུལ་ཞུས་རྗེས་སྣང་གསལ་ཞལ་འབྱེད་གནང་ཡོད། དེ་ནས་རྟེན་འབྲེལ་གྱི་གསོལ་ཇ་འབྲས་སིལ་ཕུལ་གྲུབ་མཚམས་སྲིད་སྐྱོང་བློ་བཟང་སེང་གེ་མཆོག་གིས་བཅའ་ཁྲིམས་བསྐྱར་བཅོས་ལ་མཚན་རྟགས་བཀོད་པ་དང་སྦྲགས། རིམ་བཞིན་བཀའ་བློན་རྣམ་པས་སྲིད་སྐྱོང་མཆོག་ལ་འཚམས་འདྲིའི་མཇལ་དར་ཕུལ་ཏེ་མཛད་སྒོ་གྲོལ་ཡོད། ཐེངས་འདིར་བསྐྱར་བཅོས་བྱུང་བའི་བཅའ་ཁྲིམས་རིན་པོ་ཆེའི་དོན་མཚན་བཅུ་དགུ་པར་སྲིད་སྐྱོང་མཆོག་གིས་མཚན་རྟགས་བཀོད་པ་ནས་བཟུང་མང་གཙོའི་ལམ་ནས་འོས་འདེམས་བྱས་པའི་བོད་མིའི་ཆབ་སྲིད་ཀྱི་དབུ་ཁྲིད་མཐོ་ཤོས་དེར་སྲིད་སྐྱོང་ཞེས་ཞུ་དགོས་པ་ཁྲིམས་ཐོག་ནས་བོད་མི་སྤྱི་བོ་གནམ་བསྟན་ཡོངས་ཀྱི་འགན་ཆགས་ཡོད། བཙན་བྱོལ་དབུས་བོད་མིའི་སྒྲིག་འཛུགས་ཀྱི་དྲ་ཚིགས་ལས།