སྤྲུལ་སྐུའི་ཡང་སྲིད་ལམ་ལུགས་མཇུག་སྒྲིལ་བ།

འདོན་སྤེལ། ༢༠༡༡/༠༨/༢༩

༼ འདོན་ཐེངས་སྔ་མའི་འཕྲོས། ༽ དྲུག་པ། བོད་བརྒྱུད་ནང་བསྟན་གྱི་སྤྲུལ་སྐུའི་ཡང་སྲིད་ལམ་ལུགས་མཇུག་སྒྲིལ་བ།

བ་ཡེ་མ་ཁྱེ་གཅོད་པ་ཐར་གྱིས་བརྩམས། གཟུངས་མོ་སྐྱིད་ཀྱིས་བསྒྱུར།

༡ ཀརྨ་པ་སྐུ་ཕྲེང་དང་པོ་དུས་གསུམ་མཁྱེན་པ་ལགས་ཀྱིས་སྲོལ་བཏོད་པའི་སྤྲུལ་སྐུའི་ཡང་སྲིད་ཀྱི་ལམ་ལུགས་འདི་ནི་མཚུར་ཕུ་དགོན་པ་ནས་ཐོག་མར་མགོ་བཙུགས་ཤིང་། ཀརྨ་པ་སྐུ་ཕྲེང་དང་པོ་དུས་གསུམ་མཁྱེན་པ་ཁོང་ཉིད་སྐུ་དངོས་ཀྱིས་དགོན་པ་འདི་ནས་རང་གི་ཡང་སྲིད་སྐོར་གྱི་ལུང་བསྟན་ཡི་གེ་དགེ་ཕྲུག་འགྲོ་མགོན་བདེ་ཆེན་གྱི་ལག་ཏུ་བཞག་པ་ནས། དེང་དུས་འཛམ་གླིང་ཡོངས་གྱིས་དོ་སྣང་བྱེད་བཞིན་པའི་བོད་ཀྱི་སྤྲུལ་སྐུའི་ཡང་སྲིད་ལམ་ལུགས་ཀྱི་སྲོལ་ཐོག་མར་བྱུང་བ་རེད། ཕྱི་ལོ་ ༡༢༠༤ ལོར་ཀརྨ་པ་སྐུ་ཕྲེང་གཉིས་པ་ཀརྨ་པཀྴི་མཆོག་སྐུ་འཁྲུངས་ནས་ཀརྨ་པ་སྐུ་ཕྲེང་དང་པོ་དུས་གསུམ་མཁྱེན་པ་མཆོག་གི་ཡང་སྲིད་ལ་ངོས་འཛིན་བྱས་པ་ནས་བཟུང་བོད་ཀྱི་སྤྲུལ་སྐུའི་ཡང་སྲིད་ལམ་ལུགས་དངོས་སུ་དབུ་བརྙེས་པ་དང་། དེ་ནས་རིམ་གྱིས་བོད་བརྒྱུད་ནང་བསྟན་གྱི་ཆོས་བརྒྱུད་གཞན་དག་གིས་ལག་བསྟར་བྱས། ཀརྨ་པའི་ཡང་སྲིད་རིམ་བྱོན་ནི་དེང་སྐབས་ཀྱི་སྐུ་ཕྲེང་བཅུ་བདུན་པ་ཀརྨ་པ་ཨོ་རྒྱན་འཕྲིན་ལས་རྡོ་རྗེ་བར་དུ་རྒྱུན་མཐུད་དེ་མཚམས་ཆད་མ་མྱོང་ལ། དེ་ལ་ལོ་ངོ་བརྒྱད་བརྒྱའི་ལོ་རྒྱུས་ཡོད། བཤད་ཚུལ་ལྟར་ན་ཆོས་རྒྱུད་འདིས་སྤྲུལ་སྐུའི་ཡང་སྲིད་ལམ་ལུགས་སྲོལ་ཕྱེས་པ་ནས། བོད་བརྒྱུད་ནང་བསྟན་གྱི་དབུ་ཁྲིད་གདན་རབས་སྐོར་གྱི་ལྐོག་གྱུར་རིང་ལུགས་པའི་སྲོལ་ཐོག་མར་སྤེལ་བ་རེད་ཟེར།

༢ ཏྰ་ལའི་བླ་མ་སྐུ་ཕྲེང་དང་པོ་དགེ་འདུན་གྲུབ་པ(ཕྱི་ལོ་༡༣༩༡ནས་ཕྱི་ལོ༡༤༧༤ལོ) དང་ཏྰ་ལའི་བླ་མ་སྐུ་ཕྲེང་གཉིས་པ་དགེ་འདུན་རྒྱ་མཚོ(མིང་དངོས་ལ་སངས་རྒྱས་འཕེལ་ཕྱི་ལོ་ ༡༤༧༥ ནས་ཕྱི་ལོ་ ༡༥༤༢ལོ)གཉིས་ནི་རྗེ་ཙོང་ཁ་བའི་ཐུགས་སྲས་གཉིས་ཀྱི་ཡ་གྱལ་རྒྱལ་ཚབ་རྗེ་དར་མ་རིན་ཆེན་གྱི་ཡང་སྲིད་དུ་ཐད་ཀར་གཏན་འབེབས་བྱས་པ་ཡིན་ལ། དེ་ནས་ཕྱི་ལོ་ ༡༥༧༨ ནས་ད་གཟོད་ཏྰ་ལའི་བླ་མ་སྐུ་ཕྲེང་གསུམ་པ་བསོད་ནམས་རྒྱ་མཚོ(ཕྱི་ལོ་༡༥༤༣ནས་ཕྱི་ལོ་༡༥༨༨)དངོས་སུ་སྐུ་བཙལ་ནས་ཏྰ་ལའི་བླ་མའི་སྤྲུལ་སྐུའི་ཡང་སྲིད་ཀྱི་ངོས་འཛིན་གནང་སྟངས་གསལ་བོར་བྱུང་བ་དང་། མི་རྣམས་ཀྱིས་བཤད་པ་ལྟར། སོག་པོ་རྒྱལ་བོ་ཨལ་ཐན་ཧན་གྱིས་རྒྱལ་དབང་བསོད་ནམས་རྒྱ་མཚོར“ཐམས་ཅད་མཁྱེན་པ་རྡོ་རྗེ་འཆང་ཏྰ་ལའི་བླ་མ” ཞེས་པའི་མཚན་བསྟོད་ཕུལ་ཡོད་པ་རེད།
རྗེ་ཙོང་ཁ་བའི་ཐུགས་སྲས་གཉིས་ཀྱི་ཡ་གྱལ་མཁས་གྲུབ་རྗེའི(ཕྱི་ལོ་ ༡༣༨༥ནས་ཕྱི་ལོ་༡༤༣༨) ཡང་སྲིད་ལ་པཎ་ཆེན་སྐུ་ཕྲེང་དང་པོ་ཐད་ཀར་གཏན་འབེབས་གནང་བ་དང་། དེ་བཞིན་པཎ་ཆེན་སྐུ་ཕྲེང་གཉིས་པ་ཨིར་ཏི་ནི་བསོད་ནམས་ཕྱོགས་གླང་( ཕྱི་ལོ་ ༡༤༣༩ ནས་ཕྱི་ལོ་ ༡༥༠༤ )མཆོག་ཡང་དེ་ལྟར་ངོས་འཛིན་གནང་བ་རེད། དེ་ནས་པཎ་ཆེན་སྐུ་ཕྲེང་གསུམ་པ་བློ་བཟང་དོན་འགྲུབ(ཕྱི་ལོ་༡༥༠༥ནས་ཕྱི་ལོ་༡༥༦༨)ནས་བཟུང་ད་གཟོད་དངོས་སུ་སྐུ་བཙལ་ནས་པཎ་ཆེན་ཡང་སྲིད་ལ་ངོས་འཛིན་གནང་སྟངས་བྱུང་། གུ་ཤྲིར་ཧན་གྱིས(མན་ཇུའི་བོད་སྡོད་དབུ་ཁྲིད )པཎ་ཆེན་བློ་བཟང་ཆོས་རྒྱན་ལ“པཎ་ཆེན་ཧོ་ཐོག་ཐུ”ཞེས་པའི་མཚན་བསྟོད་ཕུལ་ཡོད་ལ། དེ་ནི་པཎ་ཆེན་ཞེས་པའི་མཚན་གནས་ཀྱི་ཐོག་མའི་མགོ་འཛུགས་ཡིན་པ་དང་ཡར་སྔོན་གྱི་སྐུ་ཕྲེང་གསུམ་རྗེས་ནས་གཏན་འབེབས་བྱས་པ་ཞིག་རེད།
༣ གསེར་བུམ་དཀྲུགས་འདོན་གྱི་ལམ་ལུགས་དེ་ཕྱི་ལོ ༡༧༩༣ ལོར་མན་ཇུའི་གོང་མ་ཆན་ལུང་གིས “ བོད་ནང་ལུགས་སྲོལ་གསར་འཛུགས་ཀྱི་དོན་ཚན་ཉེན་དགུ ” ཁྱབ་བསྒྲགས་བྱས་ཏེ་གསེར་བུམ་དཀྲུགས་འདོན་གྱི་ལམ་ལུགས་གསར་བའི་སྲོལ་བཏོད། སྲོལ་ཡིག་འདིའི་ཚན་པ་དང་པོའི་ནང་དུ “ གོང་མ་ཆེན་མོས་དགེ་ལུགས་པ་དར་སྤེལ་གཏོང་སླད་ཆེད་དུ་གསེར་བུམ་བསྩལ་ཅིང་། རྗེས་ཕྱོགས་ཡང་སྲིད་ངོས་འཛིན་གནང་དུས་བསྟན་སྲུང་ཆེན་པོ་བཞི་གདན་དྲངས་ནས་ཡང་སྲིད་ཀྱི་མཚན་དང་སྐྱེས་ལོ་སྐྱེས་ཚེས་བཅས་མན་ཇུའི་ཡི་གེ་དང་རྒྱ་ཡིག བོད་ཡིག་བཅས་གསུམ་གྱིས་བྲིས་ཏེ་གསེར་བུམ་ནང་དུ་འཇོག་དགོས་པ་དང་། དེ་ནས་བླ་ཆེན་ཁག་གིས་ཉིན་བདུན་ལ་གཏད་གཉེར་བྱས་རྗེས། ཧོ་ཐོག་ཐུ་རྣམ་པ་དང་བོད་གཞུགས་ཨམ་བན་བཅས་ཀྱིས་གཙུག་ལག་ཁང་གི་ཇོ་བོ་རིན་པོ་ཆེའི་མདུན་དུ་ཟན་སྒྲིལ་མགོ་བཙུགས་ནས་ངོས་འཛིན་གནང་དགོས་ལ། ཏྰ་ལའི་བླ་མ་དང་པཎ་ཆེན་ཡང་སྲིད་ངོས་འཛིན་གནང་དུས་ཀྱང་། ཁོང་ཚོའི་མཚན་མན་ཇུའི་ཡི་གེ་དང་རྒྱ་ཡིག བོད་ཡིག་བཅས་ཀྱིས་བྲིས་ནས་གོང་གི་བརྒྱུད་རིམ་དེ་བཞིན་འགྲོ་དགོས།” ཞེས་གཏན་འབེབས་གསལ་བོ་བྱས་ཡོད།
༤ རྗེ་ཙོང་ཁ་བས་སྲོལ་བཏོད་པའི་ཆེས་ཕུལ་དུ་བྱུང་བའི་དགའ་ལྡན་ཁྲི་བའི་བདག་གཉེར་གྱི་རྣམ་པ་དང་བདག་གཉེར་བྱེད་མཁན།
ང་དང་ཨོ་སི་ཊི་ལི་ཡར་ཡོད་པའི་བོད་ཀྱི་ཤེས་ཡོན་པ་གནམ་ལོ་ཡག་གཉིས་ཀྱིས་འདིའི་སྐོར་ལ་བགྲོ་གླེང་བྱེད་སྐབས། ཁོས་བཤད་རྒྱུར “ངས་བལྟས་ན་སྤྲུལ་སྐུ་ངོས་འཛིན་གནང་སྟངས་འདི་ནི་རྗེ་ཙོང་ཁ་བ་ཆེན་མོས་སྲོལ་ཕྱེས་པའི་དགའ་ལྡན་ཁྲི་བར་དཔེར་བྱས་ན་ད་གཟོད་སྤྲུལ་སྐུའི་སྤུས་ཚད་ཇེ་ལེགས་སུ་འགྲོ་ལ། དེ་མཚུངས་འགྲོ་བ་མིའི་རིགས་ལའང་བྱས་རྗེས་འཇོག་ཐུབ་པར་འདོད། དེ་མིན། སྤྲུལ་སྐུའི་ཡང་སྲིད་ཀྱི་སྤུས་ཚད་མི་རབས་རེ་རེ་བཞིན་ཇེ་སྡུག་ཏུ་འགྲོ་བཞིན་པའི་རྣམ་པ་འདི་ཕྱིར་རུ་མངོན་ཚེ་མི་རིང་བར་གཞན་གྱི་ཡིད་ཆེས་ཡོད་ཚད་བརླག་པར་འགྱུར་ངེས། གཞན། པཎ་ཆེན་རིན་པོ་ཆེའི་ཡང་སྲིད་འཕྲོག་རེས་ཀྱི་འཐབ་རྩོད་མགོ་བརྩམས་པ་ནས་བཟུང་སྤྲུལ་སྐུའི་ལམ་ལུགས་ཐུར་ལམ་དུ་གོམ་ཁ་སྤོས་བ་དང་། རིན་པོ་ཆེ་གཅིག་ལ་ཡང་སྲིད་ཁ་ཤས་ངོས་འཛིན་གནང་སྟངས་མགོ་ཚུགས་པ་རེད། འདི་ནི་སྤྲུལ་སྐུ་ཡང་སྲིད་ལམ་ལུགས་ལ་ཐེབས་པའི་གནོད་སྐྱོན་ཚབས་ཆེན་ཞིག་ཀྱང་རེད། ” ཅེས་དང་། ཁོས་ད་དུང་བཤད་རྒྱུར། “དགེ་ལུགས་པའི་ཆོས་བརྒྱུད་ལྟར་ན་དགའ་ལྡན་ཁྲི་བའི་གོ་གནས་ནི་ཏྰ་ལའི་བླ་མ་ལས་མཐོ་ལ། དེ་ནི་དགའ་ལྡན་ཁྲི་ཐོག་དང་པོ་རྗེ་ཙོང་ཁ་བ་ཆེན་མོའི་ཁྲི་ལ་བཞུགས་མཁན་དང་དེའི་རྒྱུན་འཛིན་ཡིན་པས་རེད། དེ་བཞིན་ལོ་ངོ་ལྔ་བཅུའི་རིང་གི་ནང་བསྟན་བསླབ་གཉེར་གྱི་བརྒྱུད་རིམ་ཡོངས་སུ་མཐར་ཕྱིན་པ་དང་ཆོས་བརྒྱུད་ནང་ཁུལ་གྱི་ནང་བསྟན་རྩོད་རྒྱུགས་ཐེངས་བཅུ་གཅིག་བརྒྱུད་མཁན་དག་གི་ཁྲོད་ནས་རྩེ་ཕུད་གཅིག་བྱུང་བ་དེ་ནི་ད་གཟོད་ནང་བསྟན་ཆེས་མཐོའི་བསླབ་གཉེར་མཐར་ཕྱིན་པའི་དགའ་ལྡན་ཁྲི་བ་ཡིན་པས་ཡང་རེད། དེ་མིན་ཆེས་མཐའ་མར་གདམ་གསེས་བྱེད་སྐབས་གལ་ཏེ་རྩེ་ཕུད་ཁ་ཤས་ཐོན་ཚེ། ཁོང་ཚོའི་མིང་ཡིག་རྣམས་རེ་རེ་བཞིན་རང་རང་གི་ཆོས་གོས་ནང་དུ་བཞག་སྟེ་དཔལ་ལྡན་ལྷ་མོར་གཏད་གཉེར་གྱིས་མཆོད་ཁྲིར་སྒོ་ཐེལ་བརྒྱབ་ནས་འཇོག་དགོས་པ་དང་། ཕྱི་ཉིན་སྒོ་འབྱེད་སྐབས་ཁོང་ཚོའི་ནང་གི་མི་གཅིག་གི་ཆོས་གོས་དགའ་ལྡན་ཁྲི་བའི་ཁྲི་ཐོག་ལ་བཞག་ཡོད་པར་བཤད། འདི་ནི་དངོས་ནས་དར་སྤེལ་དུ་གཏོང་དགོས་པའི་ལམ་ལུགས་ཤིག་རེད། ” ཅེས་བརྗོད།
ངས་བལྟས་ན། དགའ་ལྡན་ཁྲི་བའི་ལམ་ལུགས་དང་ཟུང་འབྲེལ་བྱེད་དགོས་ན། སྤྲུལ་སྐུ་སུ་ཡིན་རུང་ཁོང་ཉིད་སྐུ་དངོས་སུ་བཞུགས་པའི་རིང་ལ་ཐད་ཀར་རང་གི་མཇུག་སྐྱོང་རྒྱུན་འཛིན་པ་གཏན་འཁེལ་བྱས་ཏེ། ཁོང་སྐུ་དངོས་ཀྱིས་རང་གི་རྒྱུན་འཛིན་པར་སློབ་གསོ་དང་ལམ་སྟོན་བརྒྱུད་དེ་གསོ་སྐྱོང་དང་། འཛམ་གླིང་ཡུལ་གྲུ་ཀུན་ཏུ་འཚམས་ཞུ་གཟིགས་སྐོར་ལ་འཁྲིད་པ། དེ་བཞིན་རྒྱལ་དབང་སྐུ་ཕྲེང་བཅོ་ལྔ་བ་དང་ཆོས་ལུགས་དབུ་ཁྲིད་གཞན་དག་ལ་ཁོ་རང་འཛམ་གླིང་མི་མང་ཀུན་ལ་ངོ་སྤྲོད་བྱེད་དུ་འཇུག་དགོས།
སྤྲུལ་སྐུའི་ཡང་སྲིད་ཀྱི་གནད་དོན་གཙོ་བོ་ནི་བཟང་ཆ་དང་ལེགས་པའི་ཕྱོགས་ཡིན་པས་ལམ་ལུགས་འདི་ནི་སྤྱི་ཡོངས་ཀྱི་ཁེ་ཕན་ལ་འབྲེལ་བ་དམ་པོ་ཡོད། དེས་ན་ངས་འདི་ནས་གསལ་བོར་བཤད་རྒྱུ་ཞིག་ནི། སྤྲུལ་སྐུའི་ཡང་སྲིད་འཚོལ་སྟངས་འདི་ལ་བཟང་ཆ་དང་ལེགས་པའི་ཕྱོགས་གང་ཡང་མེད་ཁར་དེ་ལས་ལྡོག་སྟེ་སྐྱོན་གྱི་ཆ་མང་པོ་འདུག ལོ་བཅུའི་ཡར་སྔོན་དུ་རྒྱ་གར་བྱང་ཕྱོགས་ངྷ་རམ་ས་ལ་ནས་ང་དང་བཙན་བྱོལ་བོད་གཞུང་གི་བདེ་སྲུང་བཀའ་བློན་སྟག་ལྷ་ཕུན་ཚོགས་བཀྲ་ཤིས་གཉིས་ཀྱིས་སྤྲུལ་སྐུའི་ཡང་སྲིད་སྐོར་ལ་གླེང་སློང་བྱས་པ་ཡིན། དང་ཐོག་ངེད་གཉིས་ཀྱི་ལོ་རྒྱུས་སྐོར་ནས་མགོ་ཚུགས་ཤིང་། དེ་ནས་ངས་ཁོ་ལ་སྤྲུལ་སྐུའི་ཡང་སྲིད་སྐོར་གླེང་དུས། ཁོ་རེ་ཐག་ཆད་ཅིང་ཡིད་སྐྱོ་བའི་ཉམས་འགྱུར་གྱིས་ང་ལ་ལན་ཅི་ཡང་མི་འདེབས་པར་རེ་ཞིག་བསམ་བློ་བཏང་རྗེས་ལག་པ་ཡར་ལ་བཀྱགས་ནས་བཤད་རྒྱུར། དཔེར་ན། འཛུབ་མོ་ལྔ་བོ་འདིའི་འགུལ་སྐྱོད་བར་ནས་འཇིམ་འབག་གམ་རྡོ་བ་སོགས་དངོས་པོ་གང་རུང་ཞིག་ལ་རྩེད་མོ་རྩེ་བ་དང་གཅིག་མཚུངས་རེད། བྱིས་པ་ཆུང་ཆུང་ཞིག་སྤྲུལ་སྐུའི་ཡང་སྲིད་དུ་ངོས་འཛིན་བྱས་པ་ནས་བཟུང་། མི་རྒན་པ་རྣམས་ཀྱི་ལག་བར་ནས་རྩེད་མོ་རྩེ་བཞིན་ཡོད་པ་རེད་ཅེས་བཤད་བྱུང་།

སྤྲུལ་སྐུའི་ཡང་སྲིད་ཀྱི་ལམ་ལུགས་འདི་ནི་མིའི་རང་གཤིས་དང་རྒྱབ་འགལ་དུ་སོང་ཞིང་། བྱིས་པའི་གཟུགས་པོ་དང་བསམ་བློ་གཉིས་ཀར་ཐེབས་པའི་མནར་གཅོད་ཅིག་ཀྱང་རེད། རྒྱལ་དབང་སྐུ་ཕྲེང་དགུ་བ་ལུང་རྟོགས་རྒྱ་མཚོ་ཕྱི་ལོ་ ༡༨༠༥ ལོར་ཁམས་འདན་ཆོས་འཁོར་ནས་སྐུ་འཁྲུངས་ཤིང་། དགུང་ལོ་གསུམ་སྟེ་ཕྱི་ལོ་ ༡༨༠༧ ལོར་ཏྰ་ལའི་བླ་མའི་ཡང་སྲིད་དུ་ངོས་འཛིན་བྱས་ཏེ་ཁམས་ནས་ལྷ་སར་གདན་འདྲེན་ཞུས་པ་དང་། ཕྱི་ལོ་ ༡༨༡༥ ལོའི་ཟླ་དང་པའི་ཚེས་ ༡༦ ཉིན་ཕོ་བྲང་པོ་ཏ་ལའི་ནང་དུ་གློ་བུར་དུ་སྐུ་མྱ་ངན་ལས་འདས། དེ་དུས་ཁོང་དགུང་ལོ་བཅུ་གཅིག་ཏག་ཏག་ཡིན་པས་མན་ཇུ་གོང་མ་ཁོང་གི་འདས་རྐྱེན་འདི་ལ་ཡིད་མ་ཆེས་པར་ཚེ་སྨོན་གླིང་ཧུ་ཐོག་ཐུ “ ཏྰ་ལའི་བླ་མའི་དོན་རྐྱེན ” ཐག་གཅོད་པར་བསྐོས་འཇོག་གིས་རྒྱལ་ཚབ་གནང་དུ་བཅུག་པ་རེད། དེ་བཞིན་པཎ་ཆེན་སྐུ་ཕྲེང་བརྒྱད་པ་བསྟན་པའི་དབང་ཕྱུག་ཁོང་ཉིད་དགུང་ལོ་དྲུག་གི་ཐོག་ཁྲི་ལ་བཀོད་ཅིང་དགུང་ལོ་སུམ་ཅུའི་སྟེང་སྙུང་གཞི་ཕོག་སྟེ་རེ་ཞིག་གཟུགས་སྐུའི་བཀོད་པ་ཆོས་དབྱིངས་སུ་འཐིམ་པའི་ཚུལ་བསྟན།
སྤྱི་ཡོངས་ནས་ལོ་ངོ་བརྒྱད་བརྒྱའི་རིང་གི་བཀའ་བརྒྱུད་སྤྲུལ་སྐུ་དང་ལོ་ངོ་སུམ་བརྒྱ་དྲུག་བཅུ་རེ་དགུའི་རིང་གི་དགའ་ལྡན་ཕོ་བྲང་གི་དངོས་བབ་ལ་བལྟས་ན། མི་སྤྱོད་ལས་འདས་པའི་སྤྲུལ་སྐུའི་ཡང་སྲིད་འཚོལ་སྟངས་འདིས་བོད་ཀྱི་སྤྱི་ཚོགས་དང་མི་དམངས་ལ་དཀའ་སྡུག་ཚད་མེད་བཟོས་ཡོད་པ་རེད། བོད་བརྒྱུད་ནང་བསྟན་གྱི་ཆོས་བརྒྱུད་ལྔ་ཡིས་མིའི་རིགས་ལ་བཞག་པའི་བསུབ་ཐབས་མེད་པའི་བྱས་རྗེས་རླབས་ཆེན་དག་ནི་འཛམ་གླིང་ཡོངས་ཀྱི་ཁས་ལེན་བཞིན་པ་ཞིག་ཡིན་ཡང་། སྤྲུལ་སྐུའི་ཡང་སྲིད་ལམ་ལུགས་འདི་དང་དེ་མིན་གནད་དོན་གཞན་དག་ཁ་ཤས། ད་རུང་ཆོས་ལུགས་དབུ་ཁྲིད་སྐོར་ཞིག་འཇིག་རྟེན་འགྲོ་ལུགས་ལ་རྨོངས་པའི་ཞན་ཆ་ཁག་ཅིག་ནི་ཧ་ཅང་མངོན་གསལ་རེད། དེ་བས་དེ་དག་ངེས་པར་དུ་བཅོས་བསྒྱུར་དང་ཇེ་ལེགས་སུ་གཏོང་དགོས་ལ། དེ་ལྟར་བྱས་ན་ད་གཟོད་བོད་ཀྱི་ཆབ་སྲིད་དང་ཆོས་ལུགས་སོགས་ལས་དོན་གཞན་དག་བོད་རང་གི་ཁྱད་ཆོས་མངོན་ཞིང་། རྒྱལ་སྤྱིའི་ཁྱབ་ཁོངས་ནས་ཀྱང་ཀུན་གྱིས་ཁས་ལེན་ཐུབ་པའི་ཚད་ལྡན་རང་བཞིན་ཅན་གྱི་མིའི་རིགས་ཀྱི་ཀུན་སྤྱོད་ཀྱི་ཚད་